L’intolleranza di un parroco vista da un poeta torrese
Questi versi, scritti da Giovanni D’Amiano, (medico pediatra e poeta per passione, nato a Volla, ma residente a Torre del Greco) sono nati “dal gesto riprovevole e incomprensibile da parte di un parroco che, durante la celebrazione della messa per trigesimo, ha letteralmente messo alla porta un poveretto che aveva osato entrare in chiesa e sedersi tra gli altri fedeli!…”, secondo quanto affermato dallo stesso autore.
Jastemma
Bbelli pparole ca diceno ‘e prievete,
ognuno ‘e lloro, quanno parla è ssanto,
siente ‘e parlà a Ggesù pe vvocca lloro,
e tte siente peccatore, nu bbrigante…
Ma, dint’â cchiesa, ‘a copp’âltare,
nu parrucchiano, cu na trista voce,
nu triste poverommo ha miso ncroce
cacciannole d’’a casa d’’o Signore.
“Esci da questa casa del Signore,
il tuo posto è la strada, il marciappiede!”
E ‘o povero pezzente, appucenuto,
sulo e sbrevognato, se n’è asciuto.
Ggesù, â casa toja, comme permiette
ca nu prevete, tristo e scellarato,
caccia a nu poverommo, disgrazziato,
d’’a casa toja, pe Tte fa’ despietto?
Tu ch’abbracciaste l’”impura Maddalena”,
ca lavaste ‘e piere scauze e ffetiente
a rrignante ‘e primm’ordine e ppezziente,
risuscitaste ‘e muorte p’’a cancrena…
Ggesù, ‘stu servo è ccore avvelenato,
è nu deserto addó nun cresce niente;
nun sape ‘a legge toja, ch’è vvulé bbene
a cchi è ssenza bbene e ddisgrazziato.
Nun sape ‘a legge santa d’âccuglienza,
‘a legge ‘e ll’mmore e dd’’o perdono,
‘a legge d’’o ppaté e dd’’a nnucenza,
ca Tu, Cristo, ncroce, hê purtato ntrono.
Mannale ancora â scola “elementare”,
pe mpararse a vvulé bbene a cchi, frate,
cerca ‘int’â casa toja nu fucularo
pe ttruvà pace e ccalore, spantecate.
24/09/2011
Giovanni D’Amiano